Áýezov aýdany №104 jalpy bilim beretin mektepte «Rýhanı jańǵyrý» aıasynda «Týǵan jer» baǵdarlamasyn basshylyqqa ala otyryp, 5–10-synyptar arasynda «Maketter saıysy» atty is-shara uıymdastyryldy. Munda oqýshylardyń týǵan jerge degen patrıottyq sezimin oıatý, Otanǵa adal qyzmet etetin jasóspirimdi tárbıeleý basty baǵyt bolyp otyr.
Elimizdiń kórkine kórik berip, ásem, záýlim saraılardyń óz nusqasynan aınymaıtyn kóshirmesi jasalǵanyn kórip, oqýshylar men ata-analardyń kóńilderi bir marqaıdy. Eń bastysy, atamekenimizde ornalasqan mańyzy bar ǵımarattar týrasynda oqýshylarmen keń aýqymdy áńgime júrgizip, tanystyrǵany boldy. Kózdiń jaýyn alatyn eńbekterge qazylar alqasynyń baǵa berýi óte qıyn boldy.
Jıynda sóz alǵan mektep basshysy Aıza Muhtarqulova ata-analar, ustazdar, oqýshylar qaýymyna rıasyz alǵysyn bildirip, shyǵarmashylyq tabys tilep, bilim ordasyna janashyr ata-analarǵa alǵys bildirdi. Oqýshylardyń qolynan shyqqan týyndylary mekteptiń dálizindegi kórmege qoıylatyn boldy. «Bul maketter mektep ǵımaratyna sán beretin syılyq», – dep rıza boldy. Oqýshylardyń rýhanı, tanymdyq oı-órisin keńeıtetin is-sharalar qalamyzdyń barlyq bilim ordasynda oryn taýyp jatsa, nur ústine nur bolar edi.
Maıgúl Orazaqynqyzy
